من يومين كده كنا أعدين في محاضرة مالية عامة لأستاذنا الدكتور محمد دويدار واللي كالعادة بيتريق على كل الطلبة وبيسأل أسئلة ممكن ميكونش ليها علاقة بالمنهج (على فكرة أنا بحب كدة)، وكانت أعدة في الركن البعيد الهادي واحدة اسمها هدير (بنت هادية ومركزة في كلام الراجل)؛ المهم، فجأة وقف الدكتور دويدار وطلب منها تقره اللي هيا كاتباه وطبعًا عبال ما يسيبلها فرصة تقره الكلام الموضوع لازم يطول وهي كمان مكنش ليها مزاج أوي
بدأت هدير تقره وبصوت واطي فسألها هو انتي معندكيش صوت حياني؟
ومن هنا بدأ الحديث عن الصوت الحياني وهو إيه أصل الكلمة دي، في الأول افتكرت إني حعرف حاجة جديدة وإني حروح البيت وأنا عارف إيه هو الصوت الحياني لكن حتى د. دويدار مكنش يعرف وانتهى الموضوع بالكلام عن البلح ، والله المحاضرة كانت مالية عامة يا جدعان بس عادي يعني!!
من شوية بقه شوفت صورة على الفيس بوك لهدير دي ومش عارف ايه بالظبط في الصورة اللي فكرني بالموقف ده فقررت إني أدور وأشوف ايه هو الصوت الحياني ....
دخلت على عم الكل المعلم جوجل ملقتش حاجة ولقيت ناس كتير بتسأل أصلًا هو إيه الصوت الحياني ده، كمان لقيت نكت عن الخاطبة اللي بترقع بالصوت الحياني، ولقيت ناس كتير اسمهم الحياني، برده لقيت مظاهرات بينتفوا فيها بالصوت الحياني ...... بس إني ألائي أصل للكلمة دي ملقيتش على الرغم من إني لقيتلها تعريفات كتير
من هنا قلت جه دورك يا بطل ... نفكر ونشوف هي ممكن تكون جت منين؟!!
أول حاجة: يمكن يكون ليها علاقة بالبلح الخياني زي ما دكتور دويدار تخيل لأول وهلة وتفسير ده ييجي من أوصاف البلحة الحيانية ذاتها اللي لما بتنضج بتتشال عنها القشرة الخارجية وبتبان من جوه زيها وي الإنسان لما يردح بالصوت الحياني بيظهر على حقيقته وكمان الصوت الحياني في تعريفه هو صوت قوي وجميل وده بردو اللي بيحصل للبلحة لما بتتقشر
ثاني احتمال ممكن إنو يكون له علاقة بالحياة، يعني مثلًا تبقى الحياني دي مشتقة من كلمة الحياة أو من كلمة أحياني لأن الصوت القوي أو العالي اللي هو بيصحيي الميتيين زي ما بيقولو
مش عايز أطول عليكو بس مستني أسمع احتمالات منكم ويمكن في الآخر نوصل لحل
طبعًا أنا مستأذنتش هدير استعمل اسمها وقصتها هنا وعارف إنها ممكن ترفع عليا قضية تطالبني بالتعويض بس معلش كله يهون في سبيل العلم!! :p:p:p
No comments:
Post a Comment