أسماء النطاقات الدولية ... الحكاية من البداية

ايه حكاية أسماء النطاقات الدولية اللي بيقولوا عليها دي

هو ممكن فعلًا يبقى عندنا موقع اسمه مصر.حكو.مص بدل الموقع اللي اسمه egypt.gov.eg ولا الكلام ده هزار؟ في السطور اللي جايه تقدر تعرف ....

أولًا في حاجة كده اسمها آيكان ICANN (Internet Corporations for Assigned Named and Numbers) شغلتها في الدنيا انها تعمل أسماء المواقع وتتحكم فيها، يعني انت لما تروح تشتري موقع كده بتشتريه من واحد تاجر قطاعي اسمه registrar وهو بقى بيكون شاري شوية أسامي مواقع من تاجر جملة أكبر اسمه registry الكبير بتاع الليلة بقى اللي بيدي بتاع الجملة ده هو ICANN كمان المنظمة دي هي اللي بتشغل الانترنت ف أي دولة أو منطقة، يعني لو صحوا الصبح زعلانين شوية ممكن يقفلوا الانترنت على دولة معينة زي ما عملوها قبل كده في العراق.

المهم الناس بتوع ICANN دول يوم الجمعة اللي فاتت (30 أكتوبر) الساعة 5:00ص بتوقيت مصر اجتمعوا في سول عاصمة كوريا الجنوبية وقرروا إنهم حيسمحوا للدول تسجل علشان يكون لها أسماء نطاقات دولية بلغاتها، النطاق الدول ده أو ccTLD (country-code Top Level Domain) هو اللي بيحدد الموقع ده تبع أنهي دولة زي مثلا مصر .eg المملكة المتحدة .uk السعودية .sa وهكذا.

الموضوع ده مش جديد ده في ناس بقالهم وهما شغالين عليه بالفعل بقالهم سنين بس كانوا خايفيين من اللخبطة لما دول ليها لغات مختلفة بس بتكتب رموز واحدة تشترك (زي إيران مثلا بتكتب بالأردو لكن الحروف زي العربي واحنا مصر بنطتب بالعربي بنفس الحروف). المهم يوم الجمعة ده اتفقوا إنهم يتيحوا الفرصة على سبيل التجربة لـ 30 دولة بس (أول 30 دولة يقدموا) والتقديم حيتفتح يوم الاثنين 16 نوفمبر خلال منتدى حوكمة الانترنت اللي حيتعمل في مصر في شرم الشيخ السنة دي إن شاء الله.

في ناس كتير بتفكر وتقول طب وايه اللي فيها يعني، احنا مالنا، وده حيفيد بإيه؟

العملية بتظهر أوي في الدول العربية زي السعودية مثلا اللي عندهم ناس مش بتعرف تدخل على النت علشان المواقع بالإنجليزي وبكده يقدروا يدخلوا على النت، وبالنسبة لنا في مصر فصحيح الـ 16 واللا الـ 18 مليون اللي بيستعملوا الانترنت معظمهم معندوش مشكلة كبيرة في المواقع اللي بالإنجليزي وحتى إنهم بيتكلموا نع بعض بالعربي عن طريق الحروف الانجليزي لكن دول 20% بس من الشعب وعلشان نوصل للـ 50أو 60% اللي احنا عايزينهم خطوة زي دي ضرورية جدًا.

كمان شركات كتير معندهاش مواقع علشان أساميها صعب تترجم للإنجليزي أو لما تيجي تدور على الموقع بتاع الشركة مش بتعرف تلاقيه بسهولة علشان اسم الشركة بالعربي والموقع مكتوب بالإنجليزي ف ده حيسهل الدنيا على الشركات، وطبعًا الكلام يشمل خدمات الحكومة الإلكترونية اللي عمالين نصرف عليها بالملايين دي ومحدش بيبوص عليها.

لو في حد عنده أي أسئلة في الموضوع يا ريت يقول وانشروا الموضوع بقة علشان مصر تسجل!!

http://icannfellows.ning.com/video/idn-fellows-icann-seoul-2009