اثبات الجنسية المصرية .

من كام يوم كده كتب الدكتور محمود عمارة مقال بيتكلم فيه عن تعسف الداخلية مع مرشحي مجلس الشعب بطلبهم إنهم يثبتوا جنسيتهم ... له كل الاحترام، وطبعًا للداخلية وطلباتها العبقرية كل تقدير.

بعدها لقيت الناس بتتكلم عن الجنسية والبرامج في التلفيزيون عمّالة تتناقل طريقة إثبات الجنسية وتحللها وكمان بتطالب بإلغاء المادة الأولى من قانون الجنسية المصري (اللي هو القانون 26 لسنة 1975)، صعقت بصراحة إن مفيش واحد ابن حلال بيفهم في القانون يقولهم مينفعش، الكلام اللي الدكتور عمارة بيقولوه ده بيقولوه القانونيين لغير القانونيين علشان يحسسوهم إن القانون مش بالمكتوب ولازم يتفهم صح.

المهم، حلخص الموضوع علشان منطولش وبعدين أعلق على التفكير العبقري بتاع الشخص اللي عايز يعجز المرشحين وطلب منهم شهادة جنسية ...

أول حاجة: إزاي الدولة بتتكون:

أي دولة علشان تبقى بلد معترف بيها لازم يتوفرلها 3 حاجات أساسية (شعب، وطن واعتراف دولي)

الأمم المتحدة بتعترف النهارده بـ 192 دولة معظم العالم يعترف بيهم، مصر بتعترف بحوالي 194 أو 195، ولو عدينا الدول اللي في العالم اللي بينطبق عليها الشروط الثلاثة دول حنلاقيهم يوصلوا لحوالي 240-250 دولة. [صدمة مش كده؟] يعني في دول موجودة وعايشة ومش معترف بيها والدنيا زي الفل (المهم ده مش موضوعنا)

أي دولة بقى علشان تبقى دولة لازم تقول هي جابت شعبها منين ودي بعض الأمثلة:

مصر: الناس اللي كانوا عايشيين فيها وعايزين ياخدوا الجنسية قبل 5 نوفمبر 1914 ونسلهم

الكويت: الناس اللي كانوا عايشين فيها قبل 1920

إسرائيل (الشاذة الوحيدة): أي يهودي بيقى إسرائيلي

أمريكا: كل شخص اتولد قبل ظهر يوم 24 مايو 1934 وعايز الجنسية الأمريكية + كل شخص يولد على الأرض الأمريكية بعد هذا التاريخ

والأمثلة على ده كتييييييييييييييير، وكل دولة لازم يبقى ليها قانون جنسية تقول فيه جابت شعبها منين وامتى وازاي وليه، وغالبًا بيبقى ف أول مادة من القانون ده.

يبقى احنا بقى لو شلنا المادة دي ولغينها نروح فييييييييييييييييييييييييييييييييييييييين؟؟!!!

تاني حاجة بقى نيجي لاثبات الجنسية:

ف أي بلد في الدنيا لازم الواحد يثبت جنسيته، ف أمريكا والدول اللي بتدي الجنسية بالميلاد على الأرض مثلا كفاية إنك تثبت إنك اتولدت على أرض البلد دي وتاخد الجنسية، في مصر والدول اللي بتدي الجنسية بالميلاد لأب او أم أو أبوين ... فلازم تثبت إن أبوك أو أمك كانوا مصريين

الإثبات ده بيتم بأي طريقة كانت، لأن دي واقعة مادية يجوز اثباتها بجميع طرق الإثبات

إنما بقى شهادة الجنسية ف دي مش حتلاقيها إلا مع فئتين من الناس:

الفئة الأولى هم الناس اللي أخدوا الجنسية قريب، أو اللي اهلمهم لسة واخدين الجنسية قريب (يعني مثلًا أبوه كان سوري وخد الجنسية أو جده بس أكتر من كده غالبًا مش حتلاقيها معاه)

الفئة التانية: هم أولاد المصريات اللي أبوهم مش مصري واتولدوا قبل 15/7/2004 لأن اللي بعد كده يكفيهم أنهم يثبتوا إن أمهم مصرية، لأن دول لازم يطلبوا الجنسية وبياخدوها وياخدو شهادة إنهم حصلوا على الجنسية.

ايه بقى اللي بيعملوه بتوع الداخلية:

ببساطة واحد منهم قرا القانون ده، وكغيره من غير المتخصصين في القانون أو اللي كانوا نايميين في محاضرات الجنسية فسر المادة على هواه وطلب من الناس شهادة جنسية، فالمرشح المحترم يروح يسأل الراجل اللي بيطلع الشهادات يقولوا مينفعش، يتخانق معاه، يدخل للمدير ف المدير يزحلقه ويقوله امشي المشوار ده مع نفسك بقى .... اثبتلي إن جد جد جد جد جد جد جدك كان ساكن ف أنهي شارع في مصر سنة 1914. فيقوم المرشح المبجل اللي المفروض كان عمل كده من الأول رايح على المحكمة ويرفع قضية مستعجلة وياخد حكم إنه مصري ويقدم.

طبعًا تحية تقدير وإجلال واحترام ليس له نظير للي بيفسروا القانون على مزاجهم ويدوخوا الناس ... إنتوا فعلًا شايفيين شغلكوا صح وبتعرفوا إزاي تطلبوا اللي مينفعش يطلب.

وبالنسبة للمثقفين أنا ممكن أعذرهم لأن للأسف ثقافتنا القانونية كلها من الأفلام والمسلسلات سواء اللي بتعرض على التليفزيون أو اللي بيقوم بانتاجها وإخراجها الصحفيين على صفحات الجرايد في صورة وقائع وقصص وأحداث